კატალოგი ხელოვნების სასახლის ქართული ხალხური სიმღერის და საკრავების სახელმწიფო მუზეუმისა და ფონდ ქართული გალობის ერთობლივი ძალისხმევით მომზადდა. ქართველი სპეციალისტებისა და უცხოელი ექსპერტის თანამშრომლობამ პროექტს საერთაშორისო მასშტაბი შესძინა.
ორენოვანი (ქართულ-ინგლისური) გამოცემის პირველი ნაწილი ფოტოალბომია, სადაც 153 საკრავის 370-ზე მეტ ფოტოს იხილავთ. ცხადია, წიგნის ფორმატიდან გამომდინარე, ვერ მოხერხდა მუზეუმის საცავებში არსებული ყველა საკრავის შეტანა, თუმცა, შეძლებისდაგვარად ვეცადეთ, სხვადასხვა ჯგუფის, ქვეჯგუფის, სახეობისა თუ წარმომავლობის ნიმუშებზე მაინც შეგვეჩერებინა ყურადღება.
კატალოგში მოცემულია ქართული ხალხური სიმღერისა და საკრავების სახელმწიფო მუზეუმში დაცული ყველა საკრავის აღწერილობა (სულ 286 ერთეული). ინფორმაცია რამდენიმე პარამეტრს აერთიანებს. ესენია: რიგითი ნომერი, სარეგისტრაციო ნომერი, ოსტატის ვინაობა, ექსპონატის შექმნის თარიღი, შექმნის ადგილი, მასალა, ზომები და ამჟამინდელი მდგომარეობა.
საკრავების კლასიფიკაციისას ვიხელმძღვანელეთ ცნობილი ეთნომუსიკოლოგების, ორგანოლოგების – კურტ ზაქსისა და ერიხ ფონ ჰორნბოსტელის საყოველთაოდ აღიარებული სისტემით.
გამოცემა გახლდათ არაკომერციული და ხელმისაწვდომია ელექტრონული ვერსიის სახით.
Discussion about this post