ქართველ ქალთა ტრადიციული მუსიკის ფესტივალი „ნანინა 2025“ ქალთა შრომის თემატიკას მიეძღვნა. ფესტივალი მიზნად ისახავს ქალთა ტრადიციული მუსიკის მიმართ ცნობადობის ამაღლებას. ფონდი „ქართული გალობა“ ფესტივალის დაარსების დღიდან მისი აქტიური მხარდამჭერია.
„ქალთა შრომა – ტრადიცია, წეს-ჩვეულებები, მუსიკა“ – ამ თემატიკას დაეთმო წლევანდელი საფესტივალო პროგრამა. ფესტივალმა გააცოცხლა ქალთა მრავალფეროვანი შრომის სახეობები და მათი თანმდევი რიტუალები, რომლებიც საუკუნეების განმავლობაში მათ ყოველდღიურობას ახლდა თან.
ღონისძიება სამეცნიერო და საკონცერტო ნაწილებისგან შედგებოდა. საქართველოს სხვადასხვა კუთხის ქალთა შრომის ტრადიციებთან დაკავშირებით ფესტივალის ფარგლებში მოეწყო თემატური გამოფენები და ვიდეოპრეზენტაციების ჩვენება.
ვულოცავთ ფესტივალის ორგანიზატორს – ეთნომუსიკოლოგთა შემოქმედებით ჯგუფ „ნანინას“, მხარდამჭერებსა და მის მონაწილეებს ფესტივალის წარმატებით დასრულებას!
Discussion about this post