“თორაძის საერთაშორისო მუსიკალურმა ფესტივალმა” კლასიკური მუსიკის მოყვარულებს თბილისში წელს 7 ივნისიდან 19 ივნისის ჩათვლით უმასპინძლა. ფესტივალი გასულ წელს “თორაძის ფონდმა” ფონდ “ქართულ გალობასა” და საქართველოს კულტურისა და სპორტის სამინისტროსთან ერთად დააფუძნა.
ფესტივალზე მსმენელის წინაშე წარდგნენ საერთაშორისო დონის შემსრულებლები – გაბრიელ პროკოფიევი (ლეგენდარული სერგეი პროკოფიევის შვილიშვილი) მაესტრო პაავო იარვი, კრისტიან ბლექშოუ, ელისაბედ ლეონსკაია, შონ ბოტკინი, სივონ კიმი, მოისეს მოლინა და სხვები. კონცერტებზე შეძენილი ბილეთებიდან შემოსული თანხა სრულად მოხმარდება ახალგაზრდა ქართველი მუსიკოს-შემსრულებლების პროფესიული განვითარების ხელშეწყობას.
საკონცერტო ნაწილის გარდა, ფესტივალი მოიცავდა ფორტეპიანოს, ფლეიტის, ჰობოის, ჩელოსა და კონტრაბასის მასტერკლასებს, რომლებსაც უძღვებოდნენ ქართველი და უცხოელი წამყვანი მუსიკოსები. მიმდინარე წელს ფესტივალის მასტერკლასებში მონაწილე ახალგაზრდა მუსიკოსებიდან 9 სტიპენდიატი გამოვლინდა, რომელთაც თორაძის ფონდის ერთწლიანი სტიპენდია დაენიშნა. ფესტივალის ფარგლებში ასევე გაიმართა კინოჩვენება ფილმისა – “Senar : Rachmaninoff’s green summers”. პრეზენტაციას სერგეი რახმანინოვის ფონდის ყოფილი გენერალური მენეჯერი ტორე ვოლონტიერი უძღვებოდა. გაიმართა კოსტა პილავაკის საჯარო ლექცია თემაზე – “What makes a great conductor?”. აღნიშნულ ღონისძიებებზე დასწრება ყველა მსურველისათვის თავისუფალი იყო.
Discussion about this post