2018 წელს თბილისის სახელმწიფო კონსერვატორიის ტრადიციული მრავალხმიანობის საერთაშორისო ცენტრმა საქართველოს განათლების, მეცნიერების, კულტურისა და სპორტის სამინისტროსა და ფონდ „ქართული გალობის“ ფინანსური მხარდაჭერი გამოსცა წიგნი „ქართული მრავალხმიანობა დასავლეთ თურქეთში: პიტერ გოლდის ნაკვალევზე“ (ქართულ, თურქულ, ინგლისურ და გერმანულ ენებზე), რომელიც დაიბეჭდა პოლონური გამომცემლობის, WPN-ის მიერ საგანგებოდ ფრანკფურტის წიგნის ბაზრობისათვის.
1968 წელს ამერიკელმა ანთროპოლოგმა პიტერ გოლდმა მე-19 ს.-ში ინეგოლში (თურქეთი) გადასახლებული ქართველებისაგან ჩაიწერა მათი ტრადიციული მუსიკა. მასალის ნაწილი 1972 წელს გამოსცა ამერიკაში, ინდიანას უნივერსიტეტის მსოფლიოში ერთ-ერთი ყველაზე ცნობილი არქივის სახელით. მან, აგრეთვე, შემოგვინახა თურქეთელი ქართველის, აჰმეთ ოზქან მელაშვილის 1965-66 წლის ჩანაწერები, ვინც ექსპედიციაში მას მეგზურობას უწევდა.
ახალგაზრდა ქართველ ეთნომუსიკოლოგებს, ამ მოვლენიდან 50 წლის შემდეგ, მიეცათ საშუალება გაევლოთ პიტერ გოლდის ნაკვალევზე, მოეძიებინათ ახალი მასალა და თანდართულ დისკზე წარმოდგენილი ძველი და ახალი ჩანაწერებით ეჩვენებინათ ინეგოლის ქართველების ტრადიციული მუსიკის წარსული და თანამედროვე მუსიკალური ყოფა.
25 ნოემბერს ინეგოლში ტმკსც-სა და ინეგოლის კავკასიური ფოლკლორისა და კულტურის ასოციაციის მიერ დაგეგმილია წიგნის პრეზენტაცია-კონცერტი, რომელშიც ქედის ანსამბლი „ელესა“ (აჭარა) ადგილობრივ მომღერლებსა და მოცეკვავეებთან ერთად შეასრულებს 1968 წელს სოფელ ჰაირიეში ჩაწერილ სიმღერებს. პრეზენტაციას თბილისის სახელმწიფო კონსერვატორიის, საქართველოს ფოლკლორის სახელმწიფო ცენტრის, ფონდ „ქართული გალობის“, ჰაირიეს საზოგადოების, აჭარის მთავრობის წარმომადგენლები და თავად პიტერ გოლდი დაესწრებიან.
წიგნზე მუშაობდნენ: ნინო რაზმაძე (შემდგენელი), ბაია ჟუჟუნაძე, თეონა ლომსაძე, მარიკა კაპანაძე.
რედაქტორები: რუსუდან წურწუმია, აბდულა აკატი, სუზან ციგლერი.
გამოცემა გახლდათ არაკომერციული და ხელმისაწვდომია ელექტრონული ვერსიის სახით.
აუდიომასალა იხილეთ აქ.
Discussion about this post